Tahua Ako Mātauranga – Rumaki Reo Māori

Ko tā te Tahua Ako Mātauranga – Rumaki Reo Māori he tuku huarahi mā te kaiako, mā te tumuaki rānei ki te whakapiki i tōna mātau ki te reo Māori me ōna tikanga me ōna pūkenga hei kaiako arareo Māori.

Ka hoatu te tahua ako he wā whakamatuatanga me te utu i te taha, tae ake ki te rua tau, hei whai i tētahi tohu tāura kua whakaaetia; he pūtea āwhina mō te taha ki ngā utu ā-akoranga, ā, mō ētahi, he pūtea āwhina anō mō te wāhi noho, mō te haere atu me te hoki mai, mō te hūnuku rānei. Ka whiwhi tonu koe i tāu utu ā-tau mō te roanga o tō wā whakamatuatanga. Ko tā te tahua anō he tuku pūtea hei āwhina i tō kura, tō kura kōhungahunga rānei ki te utu kairīwhi mō te wā o tō whakamatuatanga.

Katoa, e 42 ngā tahua ako e wātea mai ana mō ngā kaiako me ngā tumuaki kei roto i ngā whakaakoranga kōhungahunga, kura tuatahi, kura tuarua hoki.

Kua kati ngā tono mō te Tahua Ako Mātauranga – Rumaki Reo Māori 2020. Nō te Mane 26 Hereturikōkā 2019 i kati ai ngā tono.

Mēnā e hiahia ana koe ki te tono mō te tahua ako Reorua me tuku e koe tētahi tono motuhake.

Ka taea rānei e au te tono i te Tahua Ako Mātauranga – Rumaki Reo Māori?

Mēnā e hiahia ana koe ki te tono mō tētahi Tahua Ako Mātauranga – Rumaki Reo Māori, ko te tikanga:

• kua whiwhi rēhita tūturu koe hei kaiako kura kōhungahunga, kura tuatahi, tuarua rānei
• he tūranga pūmau tō tūranga i roto i ngā arareo Māori, arā he rumaki, he reorua rānei i tētahi kōhanga Reo, puna kōhungahunga, puna reo, ratonga ECE whai raihana, i tētahi kura kāwanatanga, kurā tōpū ā-kāwanatanga rānei  
• kua mātau, kua matatau rānei koe ki te reo Māori
• kua mahi kē koe i roto i ngā whakaakoranga ara rumaki reo, reorua rānei
• e ū ana tō ngākau ki te whakatipu pūkenga reo Māori, mōhiotanga tikanga Māori hoki
• kua oti i a koe te tono ki te whakauru ki tētahi o ngā tohu mātauranga kua whakaaetia
• he kōrero taunaki kei roto i tō tono hei whakaatu i te whakaaetanga me te tautoko mai o tō kaitukumahi.

Mō te tau 2019, ko te hunga ka tino hiahiatia ko ngā kaiako me ngā tumuaki e mahi ana i ngā whakaakoranga rumaki reo taumata 1 (81-100% o te wā whakamahi i te reo Māori) me taumata 2 (51-80% o te wā whakamahi i te reo Māori).

Mēnā he kaimahi hangere koe, ka taea tonu e koe te tono i tētahi tahua ako, engari me tutuki i a koe ngā tikanga whakauru. Ka rite tō tahua kia hāngai ki tō momo tūranga mahi. (FTTE).

Mēnā kāore anō tō rēhitatanga kia whakaūngia, ka taea e koe te tono mehemea ka tūturu tō rēhitatanga i mua i te Hakihea i mua mai i te tīmatanga o tō akoranga.  Mēnā ka rerekē te āhua o tō rēhitatanga me whakamōhio mai ki a mātou.

Mehemea he Kaiako Tautoko: Te Ako me te Whanonga (RTLB), e mahi ana ki ētahi kura torutoru, me pātai koe ki te tumuaki, ki te poari kaitiaki rānei o tō kura matua kia tautoko mai rātou i tō tono.

Ngā tohu kua whakaaetia

Mō ngā roanga kōrero mō ia tohu me ngā tikanga whakauru a ngā kaituku akoranga me haere ki ā rātou paetukutuku:

Te Whare Wānanga o Waikato - Te Rōpū Tohu Paerua

Te Wānanga o Raukawa – Poutāhū Whakaakoranga

Te Wānanga o Raukawa – Tāhuhu Whakaakoranga

Te Whare Wānanga o Waitaha – Hōaka Pounamu

Te tono i te Tahua Ako Mātauranga – Rumaki Reo Māori

Ka taea e koe te tono i tētahi Tahua Ako Mātauranga – Rumaki Reo Māori mā te whakaoti puka ipurangi. Tirohia tēnei pae tukutuku hei āwhina i a koe e whakaoti puka ana. Mēnā he pātai atu anō āu, whakapā mai ki a mātou mā te waea ki 0800 165 225 te īmēra rānei ki  teacher.studyawards@education.govt.nz

 Kati ai ngā tono ā te Mane 27 Hereturikōkā 2018. E kore ngā tono tōmuri e tirohia.Mā mātou koe e īmēra ki te whakaatu kua whiwhi mātou i tō tono.

Mēnā he pārongo atu anō āu hei tautoko i tō tono me tae mai rawa i mua i te 3 o Mahuru 2018.

Ka aromatawaitia tō tono mō te tahua ako e tō kaituku mātauranga matua, nā reira he pai kē atu kia tīmata e koe te tukanga whakauru i mua i te rā o te tahua.

Kia maumahara: Me tae ā-tinana atu koe ki tētahi uiui kōwhiringa me tō kaituku akoranga i mua i te wiki tuatoru o Mahuru.

Ka tae atu he kupu whakamōhio ki a koe i mua i te Paraire 5 Whiringa-ā-nuku 2018.

He aha tā te tahua hei tuku mai?

Mō te wā whakamatuatanga, ka whiwhi tonu koe i tō utu ā-tau mai i te kura, te ratonga ECE rānei tae atu ki ngā pikinga utu me ngā utu tāpui. Māu tonu e kōrero ki tō tumuaki mō ngā pikinga utu me ngā utu tāpui kia mōhio mēnā ka whiwhi koe i ēnei mō te wā whakamatuatanga. Ko tā te tahua anō he tuku pūtea āwhina ki tō kura, tō kura kōhungahunga rānei hei utu kairīwhi mō te wā o tō whakamatuatanga.

Āpiti atu ki ēnei, ko tā te tahua:

• he tuku pūtea āwhina, kaua e nui atu i te $2,000 mō te taha ki ngā utu ā-akoranga, ā, ka haere tika tēnei pūtea ki tō whare wānanga. Mā tō ake pūkoro ngā toenga utu e whakaea.
• pea e āwhina i a koe mō te taha ki tō haerenga, tō wāhi noho, te hūnuku rānei.  

Kia taea ai he pūtea āwhina mō te haerenga, te wāhi noho, te hūnuku rānei, me nui atu i te 100km mō te haere atu me te hoki mai i tō wāhi mahi ki te wāhi e tū nei tō akoranga. Mō te akoranga tau ukiuki, e $2000 te nui rawa o te pūtea ka taea – motu tahi, e $3500 rānei – motu kē. Ka rua ngā wāhanga utu mō ēnei pūtea āwhina: hei Poutūterangi te wāhanga tuatahi, hei te marama o Hōngongoi te tuarua o ngā wāhanga utu. 

Kia mōhio mai koe, ki te kore e tutuki i a koe tō tahua ako, tērā ka mate koe ki te whakahoki i ngā pūtea āwhina i tukua ki a koe mō te haere atu, te wāhi noho, te hūnuku rānei.

Ko te wā whakamatuatanga ka rite ki te roa o tō akoranga. Mēnā ka waimarie tō tono, mā mātou ngā rā akoranga e whakatau me tō kaituku akoranga.

Me aha ahau mēnā ka tāpaetia tētahi tahua mōku?

Mēnā ka whiwhi koe i tētahi tahua, ko te tikanga:

• me hōmai he kōrero hei whakaatu kua whakauru koe ki tētahi akoranga, kua oti rānei te akoranga mēnā ka inoia
• me whakaoti koe i tō tohu i roto i te wā o te tahua ako
• me noho koe ki tō kura i mua, i muri hoki i tō wā whakamatuatanga mēnā he poto iho i te tau kotahi, me hoki rānei koe ki te kura i waenga i ngā tau akoranga mēnā he tohu rua-tau tāu e whai ana
• me hoki ki tō tūranga mahi o mua, ki tētahi atu rānei e rite tonu ana, i te mutunga o tō akoranga
• whakamōhio atu i te Tāhuhu mā te waea ki 0800 165 225 mā te īmēra rānei ki  teacher.studyawards@education.govt.nz mēnā kua rerekē ngā kōrero whakapānga mōu, tō tūranga mahi, tō mahere ako, ka whai tūranga hou koe
• me hōmai he taunakitanga mō tō pūtea pēke ina ka tono pūtea āwhina koe mō te haerenga, te wāhi noho me te hūnuku ki wāhi kē.

Mēnā ka whiwhi tahua ako koe, ā, i muri iho ka whai tūranga ki kura kē, ka taea te tahua ako te whakawhiti engari me tutuki rawa i a koe ngā tikanga whakauru katoa, ā, me whai tautoko hoki i tō kaitukumahi hou.  

Mēnā ka tukua ki a koe he tūranga i kura kē, ā, ka tīmata tērā i te wā o tō whakamatuatanga, me kōrero tika koe ki tō kaitukumahi hou. Mēnā ka tautoko rātou i a koe ki te whakaoti i te tahua ako, me hōmai he taunakitanga hei whakaatu ka tautoko tō kura hou i a koe, kia whiwhi pūtea āwhina tō kura hou hei utu i te kaiako kairīwhi. 

Kāore e taea tō tahua ako te hiki atu ki tētahi tau kē, heoi, ki te whakapekaina e koe tētahi tahua, ka taea tonutia te tono anō ā tētahi atu tau. 

Ina kāore e taea e koe te whakaoti i tō akoranga, me whakapā mai ki a mātou mā 0800 165 225 kia kōrerotia ō whiringa.

Mēnā ka unu mai koe i tō tahua ako me whakamōhio i a mātou mā te īmēra ki teacher.studyawards@education.govt.nz.

Mēnā ka poroa tō tūranga mahi i tō wā whakamatuatanga, me kōrero tika atu koe ki tō kaitukumahi mō ngā whiringa. Ina kāore he tūranga hei utu i te kairīwhi, ka raru ko koe me tō āhei kia whiwhi tonu i te tahua ako, heoi, ka tutuki tonu pea i tō tono tahua ako ngā paearu mō te kōwhiringa whakangungu anō i raro i ngā ritenga mō ngā kaimahi tuwhena.

Whakapā mai

Mēnā he pātai āu, whakapā atu ki TeachNZ mā te waea 0800 165 225 mā te īmēra ki teacher.studyawards@education.govt.nz.